Breaking News, Business

HINDI  maisasama sa FATF  gray list ang bansa

Niratipikahan ng kamara ang bicameral conference committee report sa panukala na mag-aamyenda sa Anti-Money Laundering Law ng bansa, na mas maaga sa buwan ng Pebrero 2021, ang ibinigay na deadline ng Paris-based global dirty money watchdog na Financial Action Task Force.

Sinabi ni Speaker Lord Allan Velasco na ang pinagkasundong bersyon ng panukala, na nagsusulong ng mas mahigpit na probisyon sa Republic Act 9160 o ang Anti-Money Laundering Act (AMLA) of 2001, ay tutulong sa Pilipinas na maiwasan na maisama ang bansa sa gray list ng FATF-International Cooperation Review Group.

“Nalulugod kami na ang panukala ay isang hakbang na lamang upang maging ganap na batas, at naniniwala kami na mauunahan natin ang itinakdang deadline para makapagsabatas ng mas matatag na lehislasyon laban sa money laundering, upang hindi tayo mapasama sa FATF gray list,” ani Velasco

“Hindi kakayanin ng Pilipinas na mapasama sa listahang yan dahil mas lalong masasaktan ang ating lugmok na ekonomiya na patuloy na lumalaban sa pananalasa ng epekto ng pandemya,” dagdag pa niya.

Kapag naisama ang bansa sa gray list ng FATF ay mangangahulugan ito ng karagdagan na masusing pagsisiyasat mula sa mga regulators at institusyong pinansyal, pagkaantala ng pagpoproseso sa mga tansaksyon, at pagharang sa landas ng bansa na makamit ang “A” credit rating.

Katulad ni Pangulong Rodrigo Duterte, nangangamba si Speaker Velasco na ang gray listing ay makakapinsala sa sektor ng negosyo, gayundin ang ating mga manggagawa sa ibayong dagat (OFWs).

“Kailangan nating iwasan ang hindi magagandang bagay laban sa Pilipinas na maaaring magpataas ng halaga ng transaksyon sa pinansya, kasama na ang pagpapadala ng pera ng mga OFWs sa kanilang mga pamilya sa bansa,” ani Velasco.

Sinabi ni Velasco na ang pinal na bersyon ng amyenda sa AMLA ay agad na ipadadala kay Pangulong Duterte para sa kanyang lagda.

Pinuri ng pinuno ng Kamara ang three-man House contingent sa bicameral conference committee na sina Quirino Rep. Junie Cua, Manila Teachers Party-list Rep. Virgilio Lacson at Marikina City Rep. Stella Luz Quimbo, sa “tagumpay ng kanilang misyon” upang pagkasunduin ang mga hindi magkasundong probisyon ng House Bill 7904 at Senate Bill 1945.

Isinama sa inaprubahang bersyon ng bicam ang tax crime bilang predicate offense sa monery laundering at nagtakda ng daan kapag lumampas ng P25-milyon.

Nagkasundo rin ang bicam na iutos ang pagsusumite ng mga ulat sa lahat ng transaksyon sa real estate na kasasangkutan ng lagpas sa P7.5 milyon sa Anti-Money Laundering Council (AMLC).

Pinanatili rin ng Kamara ang probisyon na naggagawad ng kapangyarihan sa AMLC na mag siyasat, mag isyu ng subpoena at magsagawa ng search at seizure.

Sa pinal na bersyon ay isasama na rin ang offshore gaming operators o POGOs at ang kanilang mga service providers sa mga listahan ng mga taong iimbestigahan.

Binigyan ng FATF ang gobyerno ng Pilipinas ng hanggang ika-1 ng Pebrero na magsabatas at magpatupad ng mga pagbabago sa AMLA, alinsunod sa kanilang pamantayan laban sa money laundering at terrorist financing. Ang naunang deadline ay orihinal na itinakda noong Oktubre 2020, subalit ito ay pinalawig dahil sa pandemyang dulot ng COVID-19.

Noong taong 2000 ay napasama na ang Pilipinas sa FATF gray list dahil sa kabiguang tugunan ang usapin sa “dirty” money, na naging dahilan sa pagpasa ng RA 9160 noong 2001. Natanggal sa listahan ang bansa noong Pebrero 2005.

Napaulat na magdedesisyon ang FATF sa Hunyo imbes na Pebrero 2021 kung isasama ba nila ang Pilipinas sa gray list ng watchdog. (Vina de Guzman)